Mª JOÂO & MÁRIO LAGINHA
Auditorio de Galicia
7 de outubro de 2004. 21:00 h.
12 €. Tarifas reducidas de 6 €. para estudantes e xubiladas/os.
Dende que dous dos músicos máis talentosos de Portugal uniron as súas traxectorias profesionais, resulta abraiante comprobar a súa compenetración. Maria Joâo, cantante que destaca pola súa capacidade vocal e de improvisación, e Mario Laginha, pianista e compositor anovador, teñen gravados xa sete discos xuntos.
O jazz, entendido moito máis alá dos parámetros anglosaxóns, é o estilo co que Maria Joâo se fixo popular dentro e fóra de Portugal. Enriba do escenario esta artista lisboeta de orixe mozambicana combina con xenialidade o manexo da voz e a súa capacidade interpretativa. A súa evolución conduciuna a facer hoxe en día unha música sen etiquetas que recolle influencias de todos os lugares que visita cos seus espectáculos. A voz de María João está actualmente no cumio da súa arte, servíndose dela para crear espectáculos nos que a ousadía e a inventiva non teñen límite. Pola súa parte, Mario Laginha, despois de gravar con artistas como Wayne Shorter, Gilberto Gil e Django Bates, é reclamado como compositor para formacións como a Orquestra Sinfónica do Porto ou a Orquestra Metropolitana de Lisboa.
Considerados referentes non só no contexto da música portuguesa senón máis alá, actualmente, e aínda que embarcados en diferentes aventuras, o dúo é central nas perspectivas presentes e futuras de ambos. Emoción, creatividade e improvisación, son palabras ben acaídas para definir a experiencia de velos xuntos sobre un escenario.
Web de Maria Joâo
« Programa 2004
