Michael Nyman
Celebración do 60º aniversarioAuditorio de Galicia
26 de novembro de 2004. 21.00 h.
12 €. Tarifas reducidas de 6 €. para estudantes e xubiladas/os
Recentemente estreouse no Teatro Nacional a obra Power, de Nick Dear, con música do compositor, e a Orquestra da BBC elaborou un programa durante o pasado verán baseado nunha selección de bandas sonoras realizadas por Nyman para a gran pantalla. Películas como O cociñeiro, o ladrón, a súa muller e o seu amante, de Peter Greenaway, O Piano, de Jane Campion, Carrington, de Cristopher Hampton, ou Wonderland, de Michael Winterbottom, popularizaron o traballo do compositor londinense.
Cando Michael Nyman publicou o seu estudo sobre Experimental Music: John Cage and Beyond (1974), non se deu conta da contribución que suporía. Desinteresado polas correntes ortodoxas do modernismo internacional do momento, Nyman deixou a composición en 1964 e comezou a traballar como musicólogo. Máis adiante, dedicouse á crítica musical para varios xornais como The Spectator, no que se converteu no primeiro en utilizar o termo 'minimalismo'.
Logo de regresar aos seus traballos de composición, fixo os arranxos das cancións venecianas do século XVIII para a produción de Il Campiello de Carlo Goldoni (1976), para o que Nyman reuniu o que describiría como a banda máis orixinal que un podía imaxinar: sacabuches, chirimías xunto con banxos, bombo e saxofón. Tras engadir o seu piano e chamarlle Michael Nyman Band, esta banda converteuse no laboratorio no que Nyman desenvolveu o seu estilo musical en enérxicas melodías e ritmos tan flexíbeis como decididos.
Nos últimos anos ten dado un novo tratamento a clásicos como Mozart e colaborado estreitamente cos mestres da música india. As súas partituras, ademais de no cine e no teatro, chegaron aos videoxogos e ao mundo da moda. "Nyman demostra en cada un dos seus traballos ser unha persoa práctica e ter unha evidente disposición á colaboración, un áxil sentido do humor, unha imaxinación cultivada e unha instintiva habilidade para atraer a unha gran audiencia" (Nick Kimberley).
Michael Nyman
« Programa 2004
