portada

 

Arnaldo Antunes

O tribalista das mil caras

Auditorio de Galicia
29 de maio. 21.00 horas
12 €. Estudantes e xubilados/as 6 €

Deuse a coñecer entre o público español polo seu disco Tribalistas, xunto a Marisa Monte e Carlinhos Brown, sen lugar a dúbidas un dos éxitos da nova música brasileira e Premio Grammy ao Mellor Disco de Pop Brasileiro Contemporáneo. Pero, máis que un produto de tempada, Arnaldo Antunes é todo un creador proteico que deixou pegada na música popular, na literatura e na arte de vangarda do Brasil dos últimos vinte anos.

A súa imaxe rompedora fíxose popular como vocalista e compositor da banda Titãs, nome de referencia no rock brasileiro dos 80, coa que gravou sete discos, varios deles supervendas. A comezos dos 90 iniciou unha carreira en solitario, simultaneando a edición de discos e libros de poemas coa realización de video-arte, poemas-visuais, instalacións e performances.

Músicos como Gilberto Gil, Daniela Mercury, Adriana Calcanhotto, Caetano Veloso e Gael Costa teñen gravado as súas cancións. Como autor, Antunes converteuse nun dos máis reputados da poesía contemporánea brasileira, participando en antoloxías e recitais internacionais.

"O meu campo de acción é moi amplo e diverso, inclasificábel; non obstante, son áreas que se interseccionan, porque todas teñen en común o traballo coa palabra. A palabra para ser lida, escoitada, vista e contaminada por outros códigos", explica. Libros de poemas, ensaios, performances, esculturas, poemas visuais… A variedade do traballo de Arnaldo Antunes é unha cuestión vital. A súa música tamén chegou a gran pantalla con películas como Blue in the face, dirixida por Wayne Wang e Paul Auster.

No novo disco, Saiba, co que estrea o seu propio selo, Rosa Celeste, participan os seguintes músicos: Bartolo, Boghan Costa, Carlinhos Brown, Cézar Mendes, Chico Neves, Dadi Carvalho, Daniel Jobim, Edgard Scandurra, Fabio Tagliaferri, Haxi, Jaques Morelenbaum, Léo Bit Bit, Paulo Tatit, Pedro Sá, Walter Costa e Zaba Moreau e Marisa Monte.

No show co que está a presentar o seu novo traballo non falta un percorrido polos seus anteriores disco, incluído o éxito Tribalistas. O envolvemento escénico dos temas converte o seu directo nun espectáculo frenético no que a extravagancia das súas vestimentas, os seus movementos de pantomima e as cores do escenario deixan ao público abraiado. Efectos que non poden faltar para un músico, Arnaldo Antunes, que é moito máis que iso.


Web oficial de Arnaldo Antunes

« Programa 2005