JANE BIRKIN
Rendez vousO sábado 1 de decembro.
Ás 21:00 horas no Auditorio de Galicia.
O prezo das entradas é de 15 euros; con rebaixa a 7,50 euros para estudantes e persoas xubiladas.
Despois dunha primeira experiencia como actriz de cine na película The knack, de Richard Lester, foi contratada por Antonioni para protagonizar Blow up, film que logo conseguiu a Palma de Ouro no Festival Internacional de Cine de Cannes. En 1967 Jane decide mudarse a Francia. Contratada polo cineasta francés Pierre Grimblat para a súa película Slogan, coñeceu o seu compañeiro de reparto Serge Gainsbourg, cantante e músico. Entre eles xurdiu un amor a primeira vista que marcaría as súas vidas. Jane e Serge convertéronse nunha das parellas de moda na escena parisiense, acaparando os titulares en 1969 cunha canción sutilmente inquietante, Je t'aime moi non plus. Canción ofensiva segundo algúns e unha delicia para outros, o certo é que propiciou o escándalo. Converteuse nun éxito no mundo enteiro.
A súa voz fráxil, tenue, sempre a punto de romperse permaneceu como a súa marca distintiva e foi utilizada con intelixencia por Gainsbourg, que adaptou as súas cancións ao timbre de voz de Jane. Compuxo para ela.
Durante 12 anos, Jane e Serge permaneceron xuntos e convertéronse nunha parella popular, adorada polo público e os medios. Durante este feliz período, Jane actuou nunhas 30 películas, incluíndo moitas comedias, algunhas intrigas de detectives e na ópera prima de Serge, unha obra mestra, titulada Je t'aime moi non plus en 1975. Ao tempo continuou coa súa carreira de cantante, gravando catro discos que construíron a súa imaxe de Lolita. A principios dos 80 sepárase de Serge Gainsbourg e xorde a intención de desfacerse da imaxe de moza inglesa inxenua e divertida. Serge Gainsbourg continuou compoñendo para ela, pero as súas cancións volvéronse solemnes, complexas. O seu disco Baby alone in Babylone foi un gran éxito en 1983. En 1987 deu o seu primeiro concerto en Le Bataclan, unha antiga sala de concertos de París, e pouco a pouco comezou a estabelecer unha conexión co seu público. En 1996, o disco Version Jane foi un tributo final a Gainsbourg, que morrera uns anos antes, e incluía unha escolma das súas cancións, que Jane interpretou no templo parisiense da música L'Olympia.
En 1998, publicou o seu primeiro disco sen Serge Gainsbourg, titulado À la légère, con cancións escritas por 12 compositores contemporáneos franceses. En 1999 o músico Djamel Benyelles orientalizou algúns dos temas de Gainsbourg. Dese proxecto xorde o seu novo disco Arabesque, publicado no ano 2002. En 2004, Jane Birkin lanzou Rendez vous, un disco onde Jane ten unha serie de encontros únicos e atractivos cun universo de estrelas francesas e internacionais. No seu último álbum, Fictions, Jane contou cun marabilloso equipo de compositores, Rufus Wainwright, Arthur H, Dominique A e Cali, entre outros.
A xira coa que visita Sons da Diversidade chámase Rendez vous, espectáculo no que interpreta temas do disco do mesmo nome, de Fictions e tamén temas de Serge Gainsbourg.
Consulta a web oficial de Jane Birkin.
« Programa 2007
