No Auditorio o 28 de febreiro

Lura

As raíces rurais da diva cosmopolita de Cabo Verde

Sábado, 28 de febreiro
No Auditorio de Galicia, ás 21:00 horas
O prezo da entrada é de 15 euros, con descontos do 50% para menores de 25 anos e persoas xubiladas

A diva cosmopolita da música caboverdiana afonda nas súas raíces rurais cunha viaxe que vai do R&B aos ritmos máis auténticos da terra dos seus devanceiros. Funaná, batuku, mazurca..., a música é unha parte esencial da vida diaria do arquipélago atlántico e ten un sabor diferente en cada illa. Lura camiña entre as illas e os seus ritmos da man das xentes de Cabo Verde. Xentes que, como di a expresión que dá nome ao álbum, M’bem di fora, deixaron o campo na busca dunha vida mellor.

A historia de Cabo Verde é unha historia de migracións. De viaxes de ida e de volta. Os pais de Lura tiveron que abandonar o arquipélago cara a Lisboa na busca dunha vida mellor e, anos máis tarde, a súa filla volve na busca das xentes, da cultura e dos ritmos que eles deixaron atrás.

A bailarina e cantante caboverdiana naceu en Lisboa. Aos dezasete anos, interpretou un dúo coa estrela da música africana Juka, e o mundo descubriu o potencial da súa voz, o seu timbre fondo e as súas inflexións sensuais. Pouco despois, gravou un disco de baile cun estilo crioulo caboverdiano de fondo, ao que seguiría un cóctel de R&B e zouk, o ritmo de moda entre a mocidade de Cabo Verde.

O seu terceiro disco, o primeiro verdadeiramente caboverdiano, Di Korpu Ku Alma, foi un éxito rotundo no arquipélago e na diáspora, debido á forza identitaria de Vazulina, unha canción que falaba do afán das mulleres africanas por cambiar a natureza do seu pelo con fixador. Agora, catro anos máis tarde, Lura reafirma a súa identidade, que é a da enorme riqueza musical das illas atlánticas, con M’bem di fora, as raíces rurais da diva cosmopolita de Cabo Verde.

  • Visita a web oficial de Lura


« Programa 2009
Escoita a Lura en mp3:
As-Áuga
M'bem di fora
Ponciana